Meategien historia sakontzeko ondare interpretazio bidexka berriaren prestakuntza
Ainitzetan ondare industriala, ondarearen « ardi beltza » bezala ikusia da: ez da hain errexa gazteluak edo monumentuen bezala ikustea, edertasun edo handitasun irizpideak hartuz ; jendartean ez gira denak ados mota honetako ondarea ezagutzeko zinezko ondare gisa. Gutti maitatua dena gutti zaindua da, eta maiz ikusten da ondare hori desagertzeko arriskuan dela. Hala ere, partekatzen dugun memoriaren partea da, gure nortasun zatia da eta hori bera da ondare kontzeptua: iraganak utzi dauzkigun aztarnak nabaritzea. Meategien ondarea, aztarna horien arteko mota bat da. Bere lekua ezagutzea, nunbait, industria hartan langileen eta han segitu zuten belaunaldien lana eta nekea ezagutzea bezala da.
Euskal Herriko meategien ondarea ezagutua da Hegoaldean: han, gehiago balioan ezartzen da eta fama handiago du jendeen memorietan. Hots, meategien ustiapenak, besteak beste, bideratu zuen Bilbo hiri industrialaren urrezko aroa. Bainan ez da ahantzi behar Iparraldean ere izan zela, eta aktibitate horrek mende ainitz iraun zuela.
Gaur, Kintoan Barna mugaz gaindiko proiektuaren karietara, bolondres talde engaiatu bati esker eta herriko kontseilu laguntzarekin, ondare horien interesa erakusteko parada izanen dugu. Ondareak gure paisaian utzi dituen aztarnak hobeki ezagutzeko, proiektu berri bat prestatzen ari da, hots bisitariak eta hemengo jendeak historia aberats hortan deskubritzeko ibilbidea izanen da. Ondare interpretazio bidexka berria 2022ko udan idekiko da, han libroki eginez ala bisita gidatuen bidez, azalpenetaz gozatzeko. Gidarekin, Errobi erreka zeharkatu eta, lurpean den parte bat bisitatzen ahalko duzue, 40 metroko galeria bat gure arbaso meatzarien lan ingurumenean murgiltzeko.
Estreinaldia baino lehen, Olhaberriko bisita oraindik libroki egiten ahal da, baita taldeen bisita gidatuak ere. Beraz ez duda gurekin harremanetan sartzea zure etortzea antolatzeko, plazerra izanen da zure errezibitzea.
Xehetasunak: 06 75 72 96 08 edo olhaberri@gmail.com
Olhaberri zentroaren telefono zenbakia: 05 59 37 79 19
